શું ભારતમાં પેટ્રોલ-ડીઝલ મોંઘું થશે? રશિયા પાસેથી તેલ ખરીદવા મુદ્દે નાણામંત્રીનો મોટો ખુલાસો
અમેરિકાના રાષ્ટ્રપતિ ડોનાલ્ડ ટ્રમ્પે તાજેતરમાં દાવો કર્યો હતો કે ભારત હવે રશિયા પાસેથી ‘ક્રૂડ ઓઈલ’ (Russian Oil) ખરીદવાનું બંધ કરવા સંમત થયું છે. આ નિવેદન બાદ દેશભરમાં ચર્ચા શરૂ થઈ હતી કે શું આ નિર્ણયથી ભારતમાં ‘પેટ્રોલ-ડીઝલના ભાવ’ (Petrol-Diesel Prices) ભડકે બળશે? આ તમામ અટકળો પર હવે કેન્દ્રીય નાણામંત્રી નિર્મલા સીતારમણે (Nirmala Sitharaman) પૂર્ણવિરામ મૂકવાનો પ્રયાસ કર્યો છે.
એક એક્સક્લુઝિવ ઈન્ટરવ્યુમાં તેમણે ભારત-અમેરિકા ‘ટ્રેડ ડીલ’ (Trade Deal) અને રશિયન તેલ અંગે સરકારનું વલણ સ્પષ્ટ કર્યું હતું. જ્યારે તેમને પૂછવામાં આવ્યું કે શું રશિયન તેલ બંધ થવાથી સામાન્ય જનતા પર મોંઘવારીનો માર પડશે? ત્યારે નિર્મલા સીતારમણે સીધો હા કે ના કહેવાને બદલે વડાપ્રધાન પર વિશ્વાસ વ્યક્ત કરતા કહ્યું, “વડાપ્રધાન મોદી આ દેશના હિત વિરુદ્ધ કંઈપણ કરશે નહીં.”
તેમણે ઉમેર્યું કે, “મને પીએમ મોદી પર સંપૂર્ણ ભરોસો છે કે તેઓ જે પણ પગલું ભરશે, તે માત્રને માત્ર દેશહિતમાં જ હશે.” નાણામંત્રીનો આ જવાબ પરોક્ષ રીતે સૂચવે છે કે સરકાર ભારતની ઉર્જા સુરક્ષા સાથે કોઈ બાંધછોડ કરશે નહીં અને લોકોને સસ્તું ઈંધણ મળે તે પ્રાથમિકતા રહેશે.
બીજી તરફ, અમેરિકાના કૃષિ સચિવ બ્રુક રોલિન્સે દાવો કર્યો હતો કે આ ડીલથી ભારતમાં અમેરિકન કૃષિ ઉત્પાદનોનો પૂર આવશે અને $1.3 Billion ની વેપાર ખાધ ઘટશે. આ દાવાને કારણે ભારતીય ખેડૂતો ચિંતિત છે. આ મુદ્દે સ્પષ્ટતા કરતા નાણામંત્રીએ કહ્યું કે, “હજુ સુધી કોઈ ‘અંતિમ કરાર’ (Final Agreement) થયો નથી. સત્ય ત્યારે જ બહાર આવશે જ્યારે ડીલ ફાઈનલ થશે.”
તેમણે યાદ અપાવ્યું કે વાણિજ્ય મંત્રી પીયૂષ ગોયલે સંસદમાં પહેલેથી જ ખાતરી આપી છે કે કોઈપણ સંજોગોમાં ભારતના ડેરી અને કૃષિ સેક્ટરના (Agriculture Sector) હિતોનું સંપૂર્ણ રક્ષણ કરવામાં આવશે. એટલે કે ખેડૂતોને નુકસાન થાય તેવો કોઈ નિર્ણય સરકાર લેશે નહીં.
ડોનાલ્ડ ટ્રમ્પે સોશિયલ મીડિયા પર લખ્યું હતું કે ભારત $500 Billion ની અમેરિકન એનર્જી અને ટેકનોલોજી ખરીદશે અને ‘ટેરિફ’ (Tariff) શૂન્ય કરશે, જેનાથી ‘મેક ઈન ઈન્ડિયા’ (Make in India) પર અસર થવાની ભીતિ છે. આ અંગે વિપક્ષને જવાબ આપતા નાણામંત્રીએ કહ્યું કે, “અમે અમારા હિતોનું રક્ષણ કરીશું અને પીએમ મોદી તેમાં કોઈ કસર છોડશે નહીં.”
અંતમાં તેમણે વિપક્ષ પર પ્રહાર કરતા કહ્યું કે, “જે વિપક્ષ આજે સવાલ ઉઠાવી રહ્યો છે, તે પોતે ભૂતકાળમાં ‘મુક્ત વેપાર કરાર’ (FTA) ની તરફેણમાં હતો. હવે તેઓ અચાનક ‘દેશ વેચાઈ રહ્યો છે’ તેવો રાગ આલાપી રહ્યા છે. આપણા ઉત્પાદકો અને મેન્યુફેક્ચરર્સ પ્રત્યે થોડો આદર રાખવો જોઈએ.”
