જિયો પ્લેટફોર્મ્સનો શેર ₹1,358 પર લિસ્ટ થયો છે, જે તેની ₹1,119ની ઇશ્યૂ કિંમત કરતાં 21% વધારે છે. રિલાયન્સ બાદ તે માર્કેટ કેપિટલાઇઝેશનની દૃષ્ટિએ દેશની બીજી સૌથી મોટી કંપની બની ગઈ છે. તેનું માર્કેટ કેપ ₹12.50 લાખ કરોડ થઈ ગયું છે.
લિસ્ટિંગ બાદ કંપનીના શેર વેચવા કે હોલ્ડ કરવા?
માર્કેટ નિષ્ણાતોના મતે, જો તમે માત્ર લિસ્ટિંગ ગેઇન માટે નાણાંનું રોકાણ કર્યું છે, તો લિસ્ટિંગના દિવસે નફો વસૂલવો યોગ્ય સ્ટ્રેટેજી રહેશે. જ્યારે લાંબા ગાળાના રોકાણકારોને શેરને પોર્ટફોલિયોમાં હોલ્ડ કરવાની સલાહ આપવામાં આવે છે. નિષ્ણાતોને આશા છે કે કંપનીનો શેર થોડા સમયમાં ₹1,500થી ₹1,800 સુધી જઈ શકે છે.
માર્કેટ નિષ્ણાતો અનુસાર, લિસ્ટિંગના દિવસે શરૂઆતમાં ભારે ઉતાર-ચઢાવ જોવા મળી શકે છે, તેથી તરત જ એન્ટ્રી ન લો. જો લિસ્ટિંગ પછી શેરમાં થોડીવાર માટે ઘટાડો (ડિપ) આવે, તો ધીમે-ધીમે શેરની ખરીદી કરવી વધુ સારું રહેશે. શેરની કિંમત, વેલ્યુએશન અને કંપનીના પ્રદર્શનનું મૂલ્યાંકન કર્યા પછી જ રોકાણ કરવાનો નિર્ણય લો.
IPOને કઈ કેટેગરીમાં કેટલું સબ્સ્ક્રિપ્શન મળ્યું હતું?
NSE અનુસાર, ત્રણ દિવસ (21થી 23 ઑક્ટોબર)માં આ IPO કુલ 22.19 ગણો સબ્સક્રાઇબ થયો હતો.
કુલ સબ્સ્ક્રિપ્શન: 22.19 ગણો
QIB (સંસ્થાકીય રોકાણકારો): 70.55 ગણો
NII (બિન-સંસ્થાકીય રોકાણકારો): 14.00 ગણો
રિટેલ રોકાણકારો: 2.72 ગણો
શેર બજારમાં લિસ્ટિંગ બાદ જિયો પ્લેટફોર્મ્સ દેશની બીજી સૌથી વધુ મૂલ્યવાન કંપની બની શકે છે. ગ્રે માર્કેટના વર્તમાન પ્રીમિયમના આધારે જિયોનું માર્કેટ કેપ આશરે ₹12.61 લાખ કરોડ સુધી પહોંચી શકે છે, જે ભારતી એરટેલ કરતાં લગભગ ₹25,700 કરોડ વધુ હશે.
આ રીતે માર્કેટ કેપની દૃષ્ટિએ જિયો રિલાયન્સ ઇન્ડસ્ટ્રીઝ બાદ બીજા ક્રમે આવી શકે છે. એરટેલને પાછળ છોડવા માટે જિયોનું લિસ્ટિંગ લગભગ ₹1,342 કે તેથી વધુના ભાવે થવું જરૂરી રહેશે.
મંગળવારે NSE પર ભારતી એરટેલનો છેલ્લો ટ્રેડ થયેલો ભાવ ₹1,978.80 રહ્યો. આ ભાવે કંપનીનું માર્કેટ કેપ આશરે ₹12.35 લાખ કરોડ થાય છે.
ટોપ-5માં રિલાયન્સ ગ્રુપની બે કંપનીઓ સામેલ થઈ શકે છે
જો ગ્રે માર્કેટના સંકેતો સાચા સાબિત થાય, તો દેશની સૌથી વધુ મૂલ્યવાન કંપનીઓની યાદીમાં મોટો ફેરફાર જોવા મળી શકે છે. આશરે ₹16.19 લાખ કરોડના માર્કેટ કેપ સાથે રિલાયન્સ ઇન્ડસ્ટ્રીઝ પ્રથમ અને જિયો પ્લેટફોર્મ્સ બીજા ક્રમે હશે.
આ પછી ભારતી એરટેલ ₹12.35 લાખ કરોડ, HDFC બેંક ₹10.49 લાખ કરોડ અને ICICI બેંક ₹9.96 લાખ કરોડ સાથે અનુક્રમે ત્રીજા, ચોથા અને પાંચમા ક્રમે હશે. આ રીતે ટોપ-5માં રિલાયન્સ ગ્રુપની બે કંપનીઓ સામેલ થઈ શકે છે.
