અમેરિકા અને ઈરાન વચ્ચે ચાલી રહેલા તણાવે હવે એક નવો અને અત્યંત ગંભીર વળાંક લીધો છે. અમેરિકી રાષ્ટ્રપતિ ડોનાલ્ડ ટ્રમ્પે બુધવારે (8 જુલાઈ, 2026) એક ચોંકાવનારો દાવો કર્યો છે કે ઈરાન તેમને જાનથી મારી નાખવાનું કાવતરું ઘડી રહ્યું છે. ટ્રમ્પે ખુલ્લા શબ્દોમાં કહ્યું છે કે અમેરિકાના ટોચના નેતાઓને નિશાન બનાવવાની ઈરાનની યાદીમાં તેમનું નામ સૌથી મોખરે છે.
તુર્કીના અંકારામાં યોજાયેલી નાટો સમિટ 2026 દરમિયાન મીડિયા સાથે વાત કરતા ટ્રમ્પે ઈરાન પર આકરા પ્રહારો કર્યા હતા. તેમણે કહ્યું, “તેઓ (ઈરાન) અમેરિકાના નેતા એટલે કે મને ખતમ કરવા માંગે છે. હું તેમની યાદીમાં ટોચ પર છું. અત્યાર સુધી હું નસીબદાર રહ્યો છું અને બચી ગયો છું, પરંતુ આ નસીબ લાંબો સમય સાથ નહીં આપે.” ઈરાની નેતૃત્વ પ્રત્યે ભારે રોષ ઠાલવતા તેમણે ઉમેર્યું હતું કે, “તેઓ ખૂબ જ દુષ્ટ અને ખરાબ લોકો છે. આપણે બને તેટલી વહેલી તકે આ કેન્સરથી છુટકારો મેળવવાની સખત જરૂર છે.”
વાત માત્ર નિવેદનો પૂરતી સીમિત રહી નથી. આ જ ઈન્ટરવ્યુમાં ડોનાલ્ડ ટ્રમ્પે અમેરિકા અને ઈરાન વચ્ચેના સમજૂતી કરાર (MoU) વિશે પણ મોટી જાહેરાત કરી દીધી છે. રાતોરાત ઈરાન પર થયેલા અમેરિકાના તાજેતરના હુમલાઓનો સંદર્ભ આપતા તેમણે સ્પષ્ટ કર્યું કે, “આ હુમલાઓ બાદ હવે બંને દેશો વચ્ચેનો આ સમજૂતી કરાર કાયમ માટે સમાપ્ત થઈ ગયો છે.”
નોંધનીય છે કે, રાષ્ટ્રપતિ ટ્રમ્પનું આ આક્રમક નિવેદન એવા સમયે આવ્યું છે જ્યારે મંગળવારે (7 જુલાઈ, 2026) યુએસ સેન્ટ્રલ કમાન્ડ (CENTCOM) દ્વારા ઈરાન સામે મોટી સૈન્ય કાર્યવાહી કરવામાં આવી હતી. સેન્ટકોમના જણાવ્યા અનુસાર, ઈરાન દ્વારા આંતરરાષ્ટ્રીય જળમાર્ગો પરથી પસાર થતા અને નિર્દોષ ખલાસીઓને લઈ જતા વ્યાપારી જહાજો પર સતત હુમલા કરવામાં આવી રહ્યા હતા. આ કૃત્યની કડક સજા રૂપે અમેરિકી સેનાએ જવાબી કાર્યવાહી કરતા ઈરાનની એર ડિફેન્સ સિસ્ટમ, રડાર ઈન્સ્ટોલેશન અને IRGC દ્વારા ઉપયોગમાં લેવાતા 60 થી વધુ નાના જહાજોને નિશાન બનાવીને તેનો ખાતમો બોલાવી દીધો હતો.
