ભારે વરસાદની આગાહીને પગલે અમદાવાદમાં 25 જુલાઈએ તમામ શાળા-કોલેજો બંધ; AMC સંચાલિત આંગણવાડી 27 જુલાઈ સુધી રહેશે બંધ
ભારતીય હવામાન વિભાગ દ્વારા અમદાવાદ શહેરમાં ભારે તથા અતિભારે વરસાદની આગાહી કરવામાં આવતાં વિદ્યાર્થીઓની સલામતીને સર્વોચ્ચ પ્રાથમિકતા આપીને અમદાવાદ મ્યુનિસિપલ કોર્પોરેશન (AMC) દ્વારા મહત્વપૂર્ણ નિર્ણય લેવામાં આવ્યો છે. તકેદારીના ભાગરૂપે તા. 25 જુલાઈ, 2026 (શનિવાર)ના રોજ અમદાવાદ શહેરની તમામ સરકારી, ગ્રાન્ટ-ઇન-એઇડ તેમજ ખાનગી શાળા અને કોલેજોમાં શૈક્ષણિક કામગીરી બંધ રાખવામાં આવશે. આ ઉપરાંત AMC સંચાલિત તમામ આંગણવાડીઓને પણ તા. 27 જુલાઈ, 2026 સુધી બંધ રાખવાનો નિર્ણય લેવામાં આવ્યો છે.
AMC દ્વારા જણાવાયું છે કે ભારતીય હવામાન વિભાગની આગાહી અને વર્તમાન વરસાદી પરિસ્થિતિને ધ્યાનમાં રાખીને આ નિર્ણય લેવામાં આવ્યો છે, જેથી વિદ્યાર્થીઓ, વાલીઓ અને શિક્ષણ સાથે સંકળાયેલા તમામ લોકોની સુરક્ષા સુનિશ્ચિત કરી શકાય. વરસાદને કારણે સર્જાઈ શકે તેવી સંભવિત મુશ્કેલીઓથી બચવા માટે આ પૂર્વસાવચેતીના પગલાં લેવામાં આવ્યા હોવાનું કોર્પોરેશને સ્પષ્ટ કર્યું છે.
અમદાવાદ મ્યુનિસિપલ કોર્પોરેશને શહેરના નાગરિકો, વાલીઓ, વિદ્યાર્થીઓ તેમજ તમામ શૈક્ષણિક સંસ્થાઓને આ નિર્ણયની નોંધ લેવા અને જરૂરી સાવચેતી રાખવા અપીલ કરી છે. સાથે જ વરસાદી પરિસ્થિતિ દરમિયાન અનાવશ્યક બહાર નીકળવાનું ટાળવા, અફવાઓથી દૂર રહેવા અને માત્ર સત્તાવાર માધ્યમો દ્વારા જ આપવામાં આવતી માહિતી પર વિશ્વાસ રાખવાની પણ અપીલ કરવામાં આવી છે. AMCએ જણાવ્યું છે કે વરસાદી પરિસ્થિતિ પર સતત નજર રાખવામાં આવી રહી છે અને નાગરિકોની સુરક્ષા માટે જરૂરી તમામ વ્યવસ્થાઓ સજ્જ રાખવામાં આવી છે.
