ભારતે જાપાનના આઈચી નાગોયામાં એશિયન ગેમ્સ 2026નું ગોલ્ડન પંચ સાથે સમાપન કર્યું છે. શનિવારે એશિયન ગેમ્સના અંતિમ દિવસે ભારતીય ખેલાડીઓએ તેમના પ્રભાવશાળી પ્રદર્શનથી કુલ 9 મેડલ (5 ગોલ્ડ, 2 સિલ્વર અને 2 બ્રોન્ઝ) જીતીને બધાને આશ્ચર્યચકિત કર્યા હતા. આ સાથે આ ગેમ્સમાં ભારતનો કુલ મેડલ ટેલી 85 (21 ગોલ્ડ, 27 સિલ્વર અને 37 બ્રોન્ઝ) પર પહોંચી ગયો. ભારત હાલમાં મેડલ ટેલીમાં ચોથા સ્થાને પોતાનું અભિયાન પૂરું કરી રહ્યું છે. જોકે, રવિવારે કેટલીક ઇવેન્ટ્સ બાકી હોવાથી ભારતની મેડલ ટેલી સ્થિતિ પાછળથી બદલાઈ શકે છે.
ભારત મેડલ ટેબલમાં ચોથા સ્થાને છે. ચીન 169 ગોલ્ડ સહિત 341 મેડલ સાથે પ્રથમ સ્થાને છે, જાપાન 83 ગોલ્ડ અને કુલ 269 મેડલ સાથે બીજા સ્થાને છે. દક્ષિણ કોરિયા 39 ગોલ્ડ સહિત 150 મેડલ સાથે ત્રીજા સ્થાને છે. ભારત પછી ઉઝબેકિસ્તાન 21 ગોલ્ડ અને કુલ 70 મેડલ સાથે પાંચમા સ્થાને છે.
એશિયન ગેમ્સના 14 દિવસ દરમિયાન 495 ભારતીય ખેલાડીઓએ 36 રમતગમતની ઇવેન્ટ્સમાં ભાગ લીધો, પોતાના શ્રેષ્ઠ પ્રયાસો કરીને દેશને ગૌરવ અપાવ્યું. હોકીથી લઈને તીરંદાજી, કુસ્તી, ગોલ્ફ અને ક્રિકેટ સુધી ભારતીય ખેલાડીઓએ શાનદાર પ્રદર્શન કર્યું હતું.
