ગુજરાતમાં ઠંડીનો માહોલ રાજ્યમાં અત્યારે ઠંડીનો ચમકારો વર્તાઈ રહ્યો છે, જેમાં 11 શહેરોમાં લઘુત્તમ તાપમાન 15 ડિગ્રીથી નીચે નોંધાયું છે. ખાસ કરીને નલિયા 8 ડિગ્રી તાપમાન સાથે ઠંડીમાં ઠુંઠવાયું છે. જોકે, આગામી 5 દિવસ દરમિયાન ઠંડીમાં આંશિક ઘટાડો થવાની શક્યતા છે, કારણ કે તાપમાનમાં 3 ડિગ્રી સુધીનો વધારો થઈ શકે છે.
રાષ્ટ્રીય હવામાન વિભાગની આગાહી રાષ્ટ્રીય હવામાન વિભાગે દેશના કેટલાક વિસ્તારોમાં આગામી 5 દિવસ દરમિયાન વરસાદની મોટી આગાહી કરી છે. બંગાળના અખાતમાં સાઈક્લોનિક સર્ક્યુલેશન સર્જાવાને કારણે વાતાવરણમાં ભારે પલટો આવવાની સંભાવના છે. આ ફેરફારોને લીધે દેશના કેટલાક ભાગોમાં ઠંડીનું જોર હજુ વધશે. ખાસ કરીને ઉત્તર ભારતમાં અત્યારે હાડ થીજાવતી ઠંડી પડી રહી છે, જેના કારણે જનજીવન પર માઠી અસર જોવા મળી રહી છે.
ઉત્તર ભારતમાં, જેમાં ઉત્તર પ્રદેશ, દિલ્હી, બિહાર, રાજસ્થાન, પંજાબ અને હરિયાણાનો સમાવેશ થાય છે, શિયાળો તેની ચરમસીમાએ છે. સવાર અને રાત્રિના સમયે ગાઢ ધુમ્મસના કારણે માર્ગ, રેલ અને હવાઈ ટ્રાફિક પર અસર પડી રહી છે. ભારતીય હવામાન વિભાગે ચેતવણી આપી છે કે આગામી અઠવાડિયા સુધી પરિસ્થિતિમાં ઘટાડો થશે નહીં અને ઠંડીનું મોજું ચાલુ રહેશે.
