મેટ્રો સિટી અમદાવાદમાં માર્ચ મહિનાની શરૂઆતથી જ ગરમીનો પ્રકોપ વધી રહ્યો છે. તાપમાન 41થી 42 ડિગ્રી સેલ્સિયસ સુધી પહોંચતા લોકો પર ગરમીનો ભારે પ્રભાવ જોવા મળી રહ્યો છે. આવી સ્થિતિમાં શહેરીજનોને રાહત આપવા માટે અમદાવાદ મ્યુનિશિપલ કોર્પોરેશન દ્વારા હીટ એક્શન પ્લાન અમલમાં મૂકવામાં આવ્યો છે. આ યોજના હેઠળ શહેરમાં અનેક વ્યવસ્થાઓ કરવામાં આવી રહી છે જેથી લોકો ગરમીથી બચી શકે અને હીટ સ્ટ્રોક જેવી સમસ્યાઓથી દૂર રહી શકે.
ગરમીના સમયે લાંબા સમય સુધી સિગ્નલ પર ઊભા રહેવું ન પડે તે માટે શહેરના લગભગ 70 ટ્રાફિક સિગ્નલ બપોરે 12 વાગ્યાથી 4 વાગ્યા સુધી બંધ રાખવાનો નિર્ણય લેવામાં આવ્યો છે. જે સ્થળોએ ટ્રાફિક વધુ રહે છે ત્યાં સિગ્નલ ચાલુ રાખવામાં આવશે, પરંતુ આવા ચાર રસ્તાઓ પર લોકોને છાંયો મળે તે માટે ગ્રીન નેટ લગાવવામાં આવશે.
ગરમીમાં લોકોને પાણી સરળતાથી મળી રહે તે માટે શહેરના વિવિધ વિસ્તારોમાં મોટી સંખ્યામાં પાણીની પરબો ઉભી કરવામાં આવી રહી છે. હાલમાં 350થી વધુ પાણીની પરબો શરૂ કરવામાં આવી છે અને આગામી સમયમાં 1,000થી વધુ પરબો ઉભી કરવાની યોજના છે. તે ઉપરાંત AMTS અને BRTS બસ સ્ટેન્ડ પર પીવાના પાણી અને ORS પેકેટ ઉપલબ્ધ કરાવવામાં આવશે જેથી મુસાફરોને ગરમીમાં તકલીફ ન પડે.
જ્યાં ટ્રાફિક વધારે હોય છે અને સિગ્નલ બંધ રાખવું શક્ય નથી, ત્યાં છાંયો મળે તે માટે ગ્રીન નેટ લગાવવામાં આવશે. હાલ લગભગ 24 જેટલા મહત્વના ચાર રસ્તાઓ પર આ વ્યવસ્થા કરવામાં આવી રહી છે.ગરમીને ધ્યાનમાં રાખીને શહેરની સ્કૂલોમાં દર દોઢ કલાકે વિદ્યાર્થીઓને વોટર બ્રેક આપવામાં આવશે. આંગણવાડી કેન્દ્રોમાં પણ બાળકો અને મહિલાઓ માટે ORS પેકેટ ઉપલબ્ધ કરાવવામાં આવ્યા છે જેથી તેઓ ડિહાઇડ્રેશનથી બચી શકે.
ગરમીના દિવસોમાં લોકો સવારે અને સાંજે બહાર ફરવા જઈ શકે તે માટે શહેરના બાગ-બગીચાઓ સવારે 6 વાગ્યાથી રાત્રે 11 વાગ્યા સુધી ખુલ્લા રાખવામાં આવશે. દરેક બગીચામાં પીવાના પાણીની પણ વ્યવસ્થા કરવામાં આવી છે.
ગરમીના કારણે મજૂરોને મુશ્કેલી ન પડે તે માટે શહેરની બાંધકામ સાઇટ પર બપોરે 1થી 4 વાગ્યા સુધી કામ બંધ રાખવાની સૂચના આપવામાં આવી છે. ખાસ કરીને ઓરેન્જ અને રેડ એલર્ટ દરમિયાન આ નિયમ કડક રીતે અમલમાં મૂકવામાં આવશે.
ગરમીના કારણે જો કોઈને ચક્કર આવે, ઉલટી થાય અથવા તીવ્ર માથાનો દુખાવો થાય તો તરત નજીકના હેલ્થ સેન્ટર અથવા હોસ્પિટલમાં જવાની સલાહ આપવામાં આવી છે. શહેરની હોસ્પિટલોમાં હીટ સ્ટ્રોકના દર્દીઓ માટે અલગ બેડ પણ તૈયાર રાખવામાં આવ્યા છે.
