રાજ્યના નવનિયુક્ત પોલીસ મહાનિર્દેશક (DGP) તરીકે આઇપીએસ (IPS) અધિકારી જ્ઞાનેન્દ્ર સિંહ મલિકે (જી.એસ. મલિક) આજે ગાંધીનગર સ્થિત પોલીસ ભવન ખાતે વિધિવત રીતે પોતાનો પદભાર સંભાળી લીધો છે.
નવા પોલીસ વડાના આગમન મિશનને યાદગાર બનાવવા માટે પોલીસ ભવન કચેરીના પ્રાંગણમાં ખાસ આયોજન કરવામાં આવ્યું હતું. જ્યાં ગુજરાત પોલીસની વિશેષ ટુકડી દ્વારા નવા DGP જી.એસ. મલિકને પરંપરાગત શૈલીમાં અને પૂરા સન્માન સાથે ‘ગાર્ડ ઓફ ઓનર’ આપવામાં આવ્યું હતું. આ દરમિયાન વિભાગના અન્ય ઉચ્ચ પોલીસ અધિકારીઓ પણ મોટી સંખ્યામાં ઉપસ્થિત રહ્યા હતા.
ઉલ્લેખનીય છે કે, જી.એસ. મલિક અત્યાર સુધી અમદાવાદ શહેરના પોલીસ કમિશનર તરીકે પોતાની સેવાઓ આપી રહ્યા હતા. રાજ્ય સરકાર દ્વારા તેમની ઉત્કૃષ્ટ કામગીરી અને દીર્ઘ વહીવટી અનુભવને ધ્યાને રાખીને ગુજરાતના કાયમી પોલીસ વડા (DGP) તરીકેની મહત્ત્વની જવાબદારી સોંપવામાં આવી છે. જ્યાં સુધી અમદાવાદમાં નવા પોલીસ કમિશનરની કાયમી નિમણૂક ન થાય, ત્યાં સુધી અમદાવાદ સીપી (CP) તરીકેનો એડિશનલ ચાર્જ પણ તેમની પાસે જ યથાવત્ રહેશે. તેમના સત્તાવાર ચાર્જ સંભાળવાથી હવે રાજ્યની કાયદો અને વ્યવસ્થાની સ્થિતિ વધુ મજબૂત બનશે તેવો વિશ્વાસ વ્યક્ત કરવામાં આવી રહ્યો છે.
