ભારતમાં યોજાયેલા AI Impact Summitના ચોથા દિવસે વિશ્વના અગ્રણી ટેક નેતાઓ એક જ મંચ પર જોવા મળ્યા, જ્યાં PM મોદી સાથે ગ્લોબલ AI ઉદ્યોગના દિગ્ગજો હાજર રહ્યા. કાર્યક્રમ દરમિયાન ગ્રુપ ફોટોગ્રાફી વખતે સર્જાયેલો એક નાનો પરંતુ ચર્ચાસ્પદ ક્ષણ સોશિયલ મીડિયા પર વાયરલ બની ગયો.
મંચ પર જ્યારે બધા લીડર્સ એકતા દર્શાવવા માટે હાથ જોડીને ઉપર ઉઠાવી રહ્યા હતા, ત્યારે Sam Altman અને Dario Amodei એ અન્ય લોકોની જેમ હાથ પકડીને ઊંચા કરવાને બદલે પોતપોતાનો હાથ અલગથી ઉપર ઉઠાવ્યો. આ દૃશ્ય કેમેરામાં કેદ થઈ ગયું અને તરત જ ઈન્ટરનેટ પર ચર્ચાનો વિષય બની ગયું. ઘણા યુઝર્સે આ ક્ષણને AI ઇન્ડસ્ટ્રીની સ્પર્ધાત્મક ‘કોલ્ડ વોર’ સાથે જોડીને મીમ્સ બનાવવાનું શરૂ કર્યું.
AI ક્ષેત્રમાં બંને કંપનીઓ વચ્ચેનો વ્યાવસાયિક સ્પર્ધાત્મક ઇતિહાસ જૂનો છે. OpenAI અને Anthropic આજના સમયમાં AI રેસમાં સૌથી મોટા સ્પર્ધકો માનવામાં આવે છે. Sam Altmanના નેતૃત્વ હેઠળ OpenAIએ ઝડપી પ્રોડક્ટ લોન્ચ, વિશાળ યુઝર બેઝ અને વ્યાપક કમર્શિયલ સ્ટ્રેટેજી પર ભાર મૂક્યો છે. બીજી તરફ Dario Amodei દ્વારા સ્થાપિત Anthropicએ શરૂઆતથી જ AI સેફ્ટી, એથિકલ યુઝ અને જવાબદાર વિકાસ પર વધુ ધ્યાન કેન્દ્રિત કર્યું છે.
દારીયો અમોડેઇ અગાઉ OpenAIમાં સિનિયર પદ પર કાર્યરત રહ્યા હતા. બાદમાં તેઓએ પોતાની ટીમ સાથે અલગ થઈ Anthropicની સ્થાપના કરી. તે સમયથી જ બંને વચ્ચે વિચારોના તફાવત અને વિકાસની ગતિને લઈને ચર્ચાઓ ચાલતી આવી છે. કેટલાક નિષ્ણાતો માને છે કે AI ટેક્નોલોજીને કેટલાં ઝડપથી આગળ વધારવી અને તેની સલામતીને કેટલું પ્રાધાન્ય આપવું તે મુદ્દે થયેલા મતભેદોએ બંને કંપનીઓને અલગ માર્ગે દોરી.
AI Impact Summit દરમિયાન મંચ પર દેખાયેલી આ ક્ષણને લઈને સત્તાવાર રીતે કોઈ નિવેદન બહાર આવ્યું નથી. ઘણા વિશ્લેષકોનું માનવું છે કે કદાચ આ માત્ર એક સામાન્ય પોઝનો ભાગ હતો અને તેને વધારીને રજૂ કરવામાં આવી રહ્યો છે. તેમ છતાં સોશિયલ મીડિયા પર ચર્ચા અટકી નથી. નેટીઝન્સ આ ફોટોને લઈને હળવી મજાકથી લઈને ગંભીર વિશ્લેષણ સુધીની પ્રતિક્રિયા આપી રહ્યા છે.
આ સમિટ માત્ર વાયરલ પળો માટે જ ચર્ચામાં નથી. અહીં ભારતના AI ભવિષ્ય, ડેટા સેન્ટર ઇન્ફ્રાસ્ટ્રક્ચર, સ્કિલ ડેવલપમેન્ટ, સ્ટાર્ટઅપ ઇકોસિસ્ટમ અને સુરક્ષિત AI ઉપયોગ અંગે મહત્વપૂર્ણ ચર્ચાઓ થઈ. ભારત AI ક્ષેત્રમાં વૈશ્વિક હબ બનવા માટે જે પ્રયાસો કરી રહ્યું છે તે અંગે પણ મોટી જાહેરાતો કરવામાં આવી.
પ્રધાનમંત્રી મોદીએ પોતાના સંબોધનમાં AI ટેક્નોલોજીને માનવ વિકાસ માટે ઉપયોગી બનાવવાની જરૂરિયાત પર ભાર મૂક્યો. તેમણે ટેક્નોલોજી અને નૈતિકતાને સાથે લઈને આગળ વધવાનું મહત્વ જણાવ્યું. આ દરમિયાન વિશ્વના ટેક લીડર્સે પણ સહકાર અને જવાબદાર ઇનોવેશન અંગે પોતાના વિચારો વ્યક્ત કર્યા.
હાલમાં Sam Altman અને Dario Amodei વચ્ચેના આ ક્ષણને કોઈ સત્તાવાર વિવાદ તરીકે જોવું વહેલું છે. પરંતુ AI ઉદ્યોગમાં વધી રહેલી સ્પર્ધા અને અલગ અલગ ફિલોસોફી વચ્ચેનો તફાવત હવે ખુલ્લેઆમ ચર્ચાઈ રહ્યો છે. એક નાનો ફોટોગ્રાફ પણ કેવી રીતે વૈશ્વિક ટેક રાજકારણની મોટી ચર્ચા ઊભી કરી શકે તેનો આ જીવંત ઉદાહરણ છે.
