અમદાવાદમાં સાબરમતી નદી અંગે મહત્વનો નિર્ણય લેવામાં આવ્યો છે. વાસણા બેરેજના સમારકામને કારણે નદીનું પાણી ખાલી કરવાની પ્રક્રિયા શરૂ થશે.
રાજ્યના સિંચાઈ વિભાગે 15 એપ્રિલથી સાબરમતી નદીમાં પાણી છોડવાનું બંધ કરવાનો નિર્ણય લીધો છે. જેના કારણે આજથી નદી ધીમે ધીમે ખાલી થવાની પ્રક્રિયા શરૂ થશે. મૂળ આયોજન મુજબ 1 એપ્રિલથી નદી ખાલી કરવાની યોજના હતી. પરંતુ સ્થાનિક સ્વરાજ્યની ચૂંટણીને ધ્યાનમાં રાખીને અને ફતેહવાડી વિસ્તારના ખેડૂતોની સિંચાઈ માટે પાણીની માગણી સ્વીકારતા આ નિર્ણય મોડો લેવાયો હતો. હવે નદી ખાલી થયા બાદ વાસણા બેરેજના સમારકામનું કામ શરૂ કરવામાં આવશે.વાસણા બેરેજના કુલ 18 ગેટનું રિપેરિંગ અને બદલવાની કામગીરી હાથ ધરવામાં આવશે. જેમાં અંદાજે 9 કરોડ રૂપિયાનો ખર્ચ થશે. આ કામ માટે 60 દિવસની સમયમર્યાદા નક્કી કરવામાં આવી છે. જોકે આ કામગીરી મોડી શરૂ થવાને કારણે સમગ્ર આયોજન પર અસર પડી છે. સાથે જ સુભાષ બ્રિજના તૂટી ગયેલા સ્પાનના સમારકામનું કામ પણ આ સાથે જોડાયેલું હોવાથી તેમાં પણ વિલંબ થયો છે.
જો 15 જૂન આસપાસ અમદાવાદમાં ચોમાસું શરૂ થાય તો બેરેજના સમારકામ અને બ્રિજના કામમાં વિક્ષેપ સર્જાઈ શકે છે. વરસાદી માહોલમાં કામ કરવું મુશ્કેલ બની શકે છે. જેના કારણે સમયમર્યાદામાં કામગીરી પૂર્ણ કરવી પડકારરૂપ બનશે. આવી સ્થિતિમાં કોન્ટ્રાક્ટરને દિવસ-રાત કામ કરવાની ફરજ પડી શકે છે. જેનાથી કામની ગુણવત્તા પર પણ સવાલો ઊભા થઈ રહ્યા છે.
અમદાવાદમાં વાસણા બેરેજના સમારકામ માટે 15 એપ્રિલથી સાબરમતી નદીમાં પાણી છોડવાનું બંધ કરીને નદી ખાલી કરવાની પ્રક્રિયા શરૂ કરવામાં આવી છે. બેરેજના 18 દરવાજાના રિપેરિંગ માટે આશરે 60 દિવસનો સમય અને. 9 કરોડનો ખર્ચ અંદાજિત છે. પરંતુ મોડું શરૂ થવાથી અને 15 જૂન આસપાસ ચોમાસું શરૂ થવાની શક્યતા હોવાથી કામમાં વિલંબ અને મુશ્કેલીઓ ઊભી થઈ શકે છે.
