સોમવારે વહેલી સવારે ઓડિશાના કટકમાં આવેલી SCB મેડિકલ કોલેજ અને હોસ્પિટલમાં એક દુ:ખદ અકસ્માત સર્જાયો. હોસ્પિટલના મેડિસિન વિભાગની ઇમારતમાં આવેલા ટ્રોમા કેર ICUમાં ભીષણ આગ લાગી. અત્યાર સુધીમાં ઓછામાં ઓછા દસ દર્દીઓના મોત થયાના અહેવાલ છે.
સોમવારે સવારે લગભગ 3 વાગ્યાની આસપાસ ટ્રોમા કેર યુનિટના પહેલા માળે આગ લાગી હતી. થોડીવારમાં જ આખો ICU વોર્ડ ધુમાડાથી ભરાઈ ગયો હતો. તે સમયે, ઘણા ગંભીર દર્દીઓ લાઇફ સપોર્ટ સિસ્ટમ પર હતા.હોસ્પિટલ સ્ટાફ અને અગ્નિશામકોએ તાત્કાલિક બચાવ કામગીરી શરૂ કરી દીધી હતી. જોકે, ધુમાડા અને તીવ્ર આગના કારણે ઘણા ગંભીર રીતે બીમાર દર્દીઓ ફસાઈ ગયા હતા.
હોસ્પિટલ વહીવટીતંત્ર અને ફાયર વિભાગની તાત્કાલિક કાર્યવાહીને કારણે, ડઝનબંધ દર્દીઓને સુરક્ષિત રીતે બહાર કાઢવામાં આવ્યા. જે લોકો બચી ગયા હતા અને તેમની હાલત ગંભીર હતી તેમને તાત્કાલિક “ન્યૂ મેડિસિન આઈસીયુ” માં ખસેડવામાં આવ્યા હતા જેથી તેમની સારવાર ચાલુ રહી શકે. આગને કાબુમાં લેવા માટે ત્રણ ફાયર એન્જિન તૈનાત કરવામાં આવ્યા હતા, જેમણે કલાકોની મહેનત પછી આખરે તેને ઓલવી નાખી.
અકસ્માતના સમાચાર મળતાં જ મુખ્યમંત્રી મોહન માઝી ઘટનાસ્થળે પહોંચ્યા હતા. તેમણે પરિસ્થિતિનો તાગ મેળવ્યો અને પીડિતોના પરિવારજનો સાથે મુલાકાત કરીને સંવેદના વ્યક્ત કરી હતી. રાહત અને બચાવ કામગીરીનું નિરીક્ષણ કરવા માટે આરોગ્ય સચિવ, કટક જિલ્લા કલેક્ટર અને ડીસીપી પણ હાજર રહ્યા હતા.
