પરીક્ષા પે ચર્ચા:લખવાની ટેવ પાડો, માર્ક્સ કરતા વધારે જરૂરી છે સ્કિલ : PM મોદીની બાળકોને સલાહ
પ્રધાનમંત્રી નરેન્દ્ર મોદી શુક્રવારે સવારે 10 વાગ્યે વાર્ષિક ‘પરીક્ષા પે ચર્ચા’ (PPC) કાર્યક્રમમાં દેશભરના વિદ્યાર્થીઓ સાથે વાતચીત કરી રહ્યા છે. 2026ની આ 9મી આવૃત્તિમાં પીએમ વિદ્યાર્થીઓને પરીક્ષા દરમિયાન તણાવ-મુક્ત રહેવામાં મદદ કરવા અને લર્નિંગ પર ધ્યાન કેન્દ્રિત કરવાની ટિપ્સ આપી રહ્યા છે.
X પર એક પોસ્ટમાં પીએમ મોદીએ લખ્યું-
આ વખતે પરીક્ષા પે ચર્ચા અવશ્ય જુઓ. આ વર્ષે ઘણા રસપ્રદ વિષયો છે, ખાસ કરીને તણાવમુક્ત રહેવાની જરૂરિયાત, શીખવા પર ધ્યાન કેન્દ્રિત કરવું અને ઘણું બધું. આ એક એવું પ્લેટફોર્મ છે જેનો મેં હંમેશા આનંદ માણ્યો છે, કારણ કે તે મને દેશભરના હોશિયાર દિમાગ સાથે વાતચીત કરવાની તક આપે છે.”
27 જાન્યુઆરીના રોજ પરીક્ષા પે ચર્ચાની 9મી આવૃત્તિનો વીડિયો રિલીઝ થયો હતો, જેમાં પીએમ અલગ-અલગ સ્થળોએ બાળકો સાથે સવાલ-જવાબ કરતા જોવા મળ્યા હતા.
પીએમ મોદીએ 5 રાજ્યો દિલ્હી, કોઈમ્બતુર (તમિલનાડુ), રાયપુર (છત્તીસગઢ), દેવ મોગરા (ગુજરાત) અને ગુવાહાટી (આસામ)માં વિદ્યાર્થીઓ સાથે સીધી વાતચીત કરી છે.
PPCની 9મી આવૃત્તિમાં 4.5 કરોડથી વધુ નોંધાયેલા સહભાગીઓ અને 2.26 કરોડ વધારાના લોકો હતા, જેમણે વિવિધ પ્રવૃત્તિઓમાં ભાગ લીધો હતો.
આ વર્ષે કુલ સહભાગિતા 6.76 કરોડથી વધુ છે. ‘પરીક્ષા પે ચર્ચા’નો એપિસોડ સોની Liv, પ્રાઇમ વીડિયો અને ઝી 5 જેવા OTT પ્લેટફોર્મ પર પણ ઉપલબ્ધ થશે.
પ્રેઝન્ટેશનનો ડર કેવી રીતે ભગાવવો?
સ્ટુડન્ટે સવાલ કર્યો કે પ્રેઝન્ટેશન આપતી વખતે હું ગભરાઈ જાઉં છું. આ ડરને કેવી રીતે ભગાવવો?
PMએ કહ્યું- ક્યારેય જોયું છે કે ફૂટપાથ પર કોઈ ગરીબ મહિલા પણ જ્યારે ટીવી પર કોઈ ઘટના વિશે જણાવે છે તો કેટલા આત્મવિશ્વાસથી વાત કરે છે. શું તેણે ઈન્ટરવ્યૂની કોઈ પ્રેક્ટિસ કરી છે? ના. તેનો આત્મવિશ્વાસ તેની સચ્ચાઈમાંથી આવે છે. તેને ખબર છે કે તેણે જે જોયું છે તે જ કહેવાનું છે. તમે પણ તમારા કરેલા કામ પર ભરોસો રાખશો તો પ્રેઝન્ટેશનનો ડર ભાગી જશે.
ગોવાના શ્રીજીત ગાડગિલે સવાલ કર્યો કે, મને ગેમિંગમાં ખૂબ જ રસ છે, પરંતુ વાલીઓ સમજતા નથી. હું શું કરું?
PMએ જવાબ આપ્યો- ભારત દેશ કહાનીઓથી ભરેલો છે. તમે પોતાની ગેમ બનાવો. પંચતંત્રની કહાની પર ગેમ બનાવો. અભિમન્યુની કહાની પર ગેમ બનાવો અને પોતાની વેબસાઈટ બનાવીને તેના પર લોન્ચ કરો. ધીરે ધીરે જોશો કે કેટલા લોકો તમારી ગેમ્સ રમી રહ્યા છે.
PM બોલ્યા- ગયા વર્ષના ટોપર્સના નામ પણ યાદ છે કે શું?
એક વિદ્યાર્થીના સવાલના જવાબમાં પીએમ મોદીએ કહ્યું- ખબર નથી કે આ માર્ક્સ-માર્ક્સની બીમારી કેવી રીતે ફેલાઈ ગઈ છે. શું તમને લોકોને ગયા વર્ષના ટોપ 1 થી 10ના નામ યાદ છે? આ સિદ્ધિ તો માત્ર થોડા સમય માટે જ હોય છે. આપણે એ જોવું જોઈએ કે ભણતરની આપણા જીવન પર શું અસર થઈ છે, નહીં કે એ કે આપણા માર્ક્સ કેટલા આવ્યા છે.
સ્કિલ જરૂરી છે કે માર્ક્સ?
એક વિદ્યાર્થીએ પીએમને સવાલ કર્યો કે સ્કિલ જરૂરી છે કે માર્ક્સ. પીએમ મોદીએ કહ્યું કે આ સવાલનો કોઈ સાચો જવાબ નથી. જો તમે એક બાજુ નમશો તો પડી જશો. સાચો જવાબ એ છે કે બંને વચ્ચે સંતુલન હોવું જરૂરી છે.
PM બોલ્યા- ટીચરથી એક ડગલું આગળ રહેવું જરૂરી
એક સ્ટુડન્ટના સવાલના જવાબમાં પીએમ મોદીએ કહ્યું, ‘જો તમને લાગે છે કે ટીચરની ભણાવવાની સ્પીડ તમારી શીખવાની સ્પીડ કરતા વધારે છે, તો ગભરાવાની જરૂર નથી. આપણે ટીચરથી પણ એક ડગલું આગળ રહેવાની જરૂર છે.’
